Cinco anos de investigación recuperan a historia de San Miguel de Aviño e a memoria dunha parroquia
A historia de San Miguel de Aviño queda desde agora recollida nunha nova publicación que combina investigación histórica, memoria veciñal e defensa do patrimonio. O seu autor, Manuel González Gutiérrez, presentou a obra 'La antigua feligresía de San Miguel de Aviño' na propia igrexa parroquial, nun acto no que estivo acompañado por numerosos veciños.
O libro é o resultado de cinco anos de investigación, un traballo que levou ao autor a consultar arquivos, percorrer distintos lugares e revisar centos de publicacións para reconstruír a evolución histórica da parroquia. A investigación contou tamén coa colaboración de veciños que facilitaron fotografías e outros documentos que forman parte da publicación.
A orixe do proxecto está nun episodio acontecido en setembro de 2021 na propia igrexa de San Miguel de Aviño. Segundo explica o autor, unha máquina entrou no templo e realizou traballos no chan, onde foran enterradas máis dun cento de persoas, entre elas os seus propios tataravós.
González Gutiérrez comunicou daquela a situación á Dirección Xeral de Patrimonio da Xunta e ao Concello de Valdoviño. Tras recibir o aviso, o Concello paralizou a intervención. Este episodio levou o autor a iniciar unha investigación sobre a historia do templo e da parroquia, que acabou dando lugar á publicación presentada estes días.
A obra non se limita á historia da igrexa. O autor recupera tamén diferentes capítulos da evolución de Aviño e da súa antiga freguesía, así como costumes, celebracións, lugares e outros elementos vinculados á memoria colectiva dos seus habitantes.
Entre os episodios recollidos destaca o papel que Aviño chegou a desempeñar como capitalidade municipal en 1863, cando a casa consistorial foi trasladada desde San Bartolo. O libro percorre así diferentes momentos da historia local para deixar por escrito parte dun patrimonio que, segundo o autor, corre o risco de perderse co paso das xeracións.
Durante a presentación, Manuel González Gutiérrez quixo agradecer especialmente o apoio da súa familia e a colaboración dos veciños que contribuíron coa documentación gráfica empregada na obra.
A publicación nace así coa intención de conservar para o futuro tanto a historia do templo de San Miguel de Aviño como a memoria dunha parroquia e das persoas que contribuíron ao seu desenvolvemento.