Cinco días de festa en Cabanas con concertos, feira, deporte e actividades para toda a familia
Cabanas xa está preparada para vivir unha nova edición das Festas de Santa Marta, que encherán o municipio de música, deporte, tradición e actividades para todas as idades entre o mércores 29 de xullo e o domingo 2 de agosto.
A programación arrancará o mércores coa actuación da orquestra Cinema e a sesión de DJ Brunokavi, que abrirán oficialmente cinco días de celebración.
O xoves combinarase a festa coa solidariedade grazas á presenza do autobús de doazón de sangue no aparcadoiro da Oficina de Turismo, en horario de 10.00 a 14.00 horas e de 16.00 a 20.00 horas. Pola noite será a quenda da orquestra Panamá e do DJ Federato.
O venres abrirá as súas portas a tradicional Feira de Santa Marta, que permanecerá activa durante toda a fin de semana. A xornada incluirá tamén unha actividade deportiva inclusiva de Sportodxs no parque do Areal, onde será posible coñecer e practicar diferentes modalidades de deporte adaptado. Pola tarde haberá festa infantil con inchables, escuma e animación cultural, antes do concerto do grupo TrendingTropic.
O sábado continuará a feira e disputarase unha nova edición do torneo 3x3 Cabanas. A música volverá ser protagonista coa actuación de The Broken Peach, The Women Boss, Trío Tal para Cal e Virtual Proyect.
A programación pecharase o domingo cunha intensa xornada na que se celebrarán o XXXIII Cross Popular Piñeiral de Cabanas, a última sesión da feira, a segunda xornada do torneo 3x3, unha sesión vermú, o tradicional xantar popular e a misa solemne na honra de Santa Marta na capela da Madalena.
As Festas de Santa Marta volverán converter Cabanas nun punto de encontro para veciñanza e visitantes, cun programa que combina cultura, lecer, deporte e tradición durante cinco días.