Fillas de Cassandra traerá o seu novo disco 'Tertúlia' ao escenario do Pazo da Cultura
illas de Cassandra presentará o seu novo traballo discográfico, 'Tertúlia', o vindeiro 31 de outubro no Pazo da Cultura, nun concerto que comezará ás 20.00 horas. O dúo formado polas músicas viguesas María Soa e Sara Faro regresa aos escenarios cunha proposta que afonda na súa identidade artística e converte o cotián nun espazo de encontro, celebración e reivindicación colectiva.
O espectáculo toma como punto de partida o segundo álbum do grupo, publicado en 2026 e producido musicalmente xunto a Çantamarta, co selo Altafonte. 'Tertúlia' constrúe un universo no que teñen cabida as conversas entre amigas, as tardes compartidas coas veciñas e os bailes que se prolongan ata o esgotamento. Entre a tenrura e a provocación, o traballo explora as relacións persoais e os pequenos momentos da vida diaria.
A nova proposta chega despois dunha etapa de consolidación para Fillas de Cassandra. Tras superar os 130 concertos nos dous últimos anos, o proxecto converteuse nunha das referencias emerxentes da música galega, grazas ao seu primeiro álbum, 'Acrópole', e á xira 'Últimas Dionisíacas'.
En 2025, María Soa e Sara Faro publicaron tamén 'Hibernarse', un proxecto expandido a través dun EP, un fanzine e un videofilme arredor da necesidade de facer unha pausa nos procesos creativos. Agora, con 'Tertúlia', o dúo abre unha nova etapa cun espectáculo que transita entre os espazos domésticos e a praza pública, entre a sobremesa e a verbena.
O concerto propón un directo enérxico no que o público non se limita a observar, senón que pasa a formar parte desa tertulia colectiva que dá nome ao disco. A actuación combina música e movemento nunha experiencia pensada para compartir, bailar e celebrar a comunidade.
As entradas teñen un prezo de 24 euros para o público xeral, mentres que as persoas abonadas e as que poidan acceder á tarifa reducida pagarán 16,80 euros. A venda está dispoñible a través da web do Pazo da Cultura.