Neda aposta polo cinema documental con cinco proxeccións gratuítas este outono
A Casa da Cultura de Neda converterase durante as próximas semanas nun espazo dedicado ao cinema documental coa programación do ciclo 'Outono das artes', unha iniciativa impulsada pola Deputación da Coruña coa que o Concello incorpora cinco proxeccións á súa oferta cultural de setembro e outubro.
As sesións terán lugar os venres ás 20.30 horas e serán de acceso gratuíto. A primeira proxección será este venres, coincidindo coa programación vinculada ao Día Internacional da Fotografía.
O ciclo arrancará con 'Mary Quintero. Máis de 90 anos de creatividade', unha peza audiovisual que repasa a traxectoria dunha das fotógrafas e retratistas galegas máis destacadas do século XX. A proxección realizarase en formato de gran tamaño na Casa da Cultura.
Un percorrido polas terras do lobo
A segunda cita será o 25 de setembro, coa proxección de 'Salvaxe, salvaxe', un filme-ensaio que percorre as chamadas terras do lobo de Galicia e Portugal para abordar a relación entre as persoas, os animais e a paisaxe que comparten.
Xa no mes de outubro, o ciclo continuará con tres novas propostas. O 2 de outubro será a quenda de 'Ao son da nova regueifa', un documental centrado na tradición da regueifa e na súa evolución na actualidade.
O 9 de outubro proxectarase 'Crónicas dun non!!', que aborda a historia do movemento da insubmisión en Galicia a través da experiencia do seu director, Fernando Rodríguez Gómez 'Peñaño'. O documental repasa a súa negativa a incorporarse ao servizo militar obrigatorio en 1989, unha decisión pola que foi condenado a un ano de cárcere.
O ciclo pecharase o 16 de outubro con 'Le Archeólogue' (El arqueólogo), unha curtametraxe que forma parte do proxecto sociocultural 'Cru: memoria coruñesa sobre o Mar Exeo'.
As cinco sesións do 'Outono das artes' incluídas na programación municipal serán gratuítas, permitindo achegar diferentes propostas de cinema documental á veciñanza durante os meses de setembro e outubro.