O BNG critica a programación das festas de Ferrol por considerar 'marxinal' a presenza da cultura galega
O Bloque Nacionalista Galego (BNG) de Ferrol cargou contra a programación das festas de verán presentada polo goberno local ao considerar que deixa a lingua e a cultura galegas nun papel secundario e que foi elaborada sen diálogo cos grupos da oposición. A formación cuestiona tamén que a maior parte das propostas estean dirixidas a un perfil de público moi concreto, deixando fóra outros sectores da cidadanía.
A concelleira María do Mar López criticou que a programación fose trasladada á oposición na comisión informativa celebrada o pasado venres, cando, segundo sinala, xa fora presentada publicamente e difundida a través dos medios de comunicación e das canles oficiais do Concello.
En relación co contido das festas, o BNG recoñece que nesta edición aumenta o número de actuacións en galego respecto ao pasado ano, pero considera que a presenza da cultura propia continúa sendo insuficiente. A formación sostén que o espazo reservado á lingua galega segue a ser reducido en comparación co destinado a propostas noutras linguas.
Os nacionalistas tamén botan en falta unha programación infantil específica en galego. Segundo indican, a única actividade prevista para o público familiar é unha festa infantil programada para o 29 de agosto que, de manter o formato doutras edicións, consistirá nunha xornada con inchables. Ao seu xuízo, esta oferta resulta escasa para unha cidade recoñecida como Cidade Amiga da Infancia.
O BNG defende que as festas deberían contar cunha programación máis plural, con maior presenza da cultura galega e actividades pensadas para públicos de diferentes idades. As críticas prodúcense poucos días despois de que o Concello presentase un cartel que inclúe actuacións de artistas como Fangoria, Vanesa Martín, Siloé, Leire Martínez, Celtas Cortos, Danny Romero, Henry Méndez ou as orquestras París de Noia e La Misión, ademais doutras propostas musicais e de lecer previstas entre o 21 e o 31 de agosto.