O BNG pide ao Goberno que aclare as advertencias de Defensa sobre a planta de SAIC en Ferrol
As advertencias sobre os posibles riscos para a seguridade nacional asociados á futura planta de SAIC en Ferrol provocaron unha nova reacción política. O BNG rexistrará unha iniciativa no Congreso para pedir explicacións ao Goberno español e reclamar que, se non comparte a posición atribuída ao Ministerio de Defensa e ao CNI, desautorice publicamente esas consideracións.
O deputado nacionalista Néstor Rego cualificou de 'inaceptábel' que se estean difundindo informacións segundo as cales o Exército español e o Centro Nacional de Intelixencia considerarían a instalación da empresa chinesa unha ameaza. O BNG quere saber se o Goberno comparte esta posición e, en caso contrario, reclama unha rectificación de Defensa.
A formación nacionalista considera especialmente grave que estas advertencias poidan acabar condicionando un proxecto industrial que, segundo sinala, pode xerar centos de postos de traballo nunha das comarcas máis castigadas pola reconversión industrial. Por iso, Rego reclama que a iniciativa sexa avaliada polo seu impacto económico e industrial e non pola nacionalidade da compañía.
'Non está o noso País, que leva décadas nunha crise industrial crónica, para ese tipo de xogos que máis parece ditados polo amigo americano', afirmou o deputado, que considera necesario desbotar calquera dúbida sobre o uso dos argumentos relacionados coa seguridade nacional para frear a implantación da fábrica.
Rego tamén cuestionou os hipotéticos riscos de espionaxe electrónica, ciberataques ou acceso a información relacionada coa Armada e coa industria naval militar que se estarían analizando pola proximidade da futura planta ás instalacións militares de Ferrol. O deputado recorreu á retranca para poñer en dúbida estas preocupacións e mencionou os casos de espionaxe relacionados con Angela Merkel e o programa Pegasus.
A iniciativa do BNG chega nun momento no que o proxecto de SAIC conta co respaldo da Xunta e do Goberno español, mentres continúa o debate arredor das garantías de seguridade que deberán acompañar a futura implantación. A Xunta declarou en xuño o desenvolvemento inicial do complexo industrial como Proxecto Industrial Estratéxico, cunha previsión de creación de emprego tanto en Ferrol como nas Pontes.