O CIMIX de Narón inaugura este venres 'Organismo Vivo', a mostra que percorre a obra de SØJĒ POLCÆM
O Museo CIMIX de Narón inaugura este venres, 18 de setembro, a exposición 'Organismo Vivo (Cartografía dunha conciencia en transformación)', do artista SØJĒ POLCÆM. A mostra permanecerá aberta ao público ata o próximo 1 de outubro no Muíño de Xuvia.
O acto de apertura terá lugar ás 12.00 horas e contará coa presenza do propio artista. Na inauguración tamén participarán a concelleira de Turismo, Natalia Hermida, e a profesora de filosofía Belén Castellanos.
Un percorrido por unha conciencia en transformación
'Organismo Vivo' afástase do formato dunha retrospectiva cronolóxica ou dunha simple colección de obras independentes. A proposta pretende introducir o visitante na cartografía dunha conciencia en constante transformación, prestando atención tanto ás pezas finais como aos procesos creativos que están detrás delas.
Ao longo do percorrido, obras, poemas, imaxes e videopoemas intégranse nunha mesma estrutura artística en movemento. A exposición formula cuestións relacionadas coa natureza humana, a construción da identidade e o papel da arte nun contexto marcado pola aceleración tecnolóxica.
A mostra reúne creacións procedentes de diferentes disciplinas, entre elas poesía, fotografía, videocreación, reflexión filosófica e experimentación visual. En lugar de ofrecer respostas pechadas, a exposición propón ao público un percorrido aberto no que cada espazo funciona como unha etapa dunha viaxe.
O Muíño de Xuvia como parte da propia exposición
A elección do CIMIX como escenario para esta proposta responde tamén ao diálogo entre o espazo e o concepto da exposición.
O antigo muíño conserva nas súas paredes a pegada da materia, a técnica, o paso do tempo e a transformación. Estes elementos conectan coa visión artística de SØJĒ POLCÆM, que entende a arte como unha ferramenta humana capaz de converter a experiencia en símbolo, a memoria en forma e o pensamento en imaxe.
Da carpintería de Bazán á creación artística
SØJĒ POLCÆM naceu en Ferrol en 1966 e creceu no barrio de San Pablo, nunha familia traballadora. Formouse en Delineación Industrial e comezou a traballar aos 16 anos como carpinteiro de dique e gradas na antiga Bazán, actualmente Navantia.
Durante a súa etapa profesional tamén desenvolveu unha ampla traxectoria sindical en CCOO. Paralelamente, cultivou de maneira autodidacta a filosofía e a poesía, ata que en 2022 adoptou o nome artístico SØJĒ POLCÆM e puxo en marcha o proxecto dixital 'O Mundo Segundo SØJĒ POLCÆM'.
A súa primeira exposición chegou en 2024, na galería DGD de Mallorca. Un ano máis tarde, unha das súas obras foi incluída nun catálogo de Magna Art Auctions xunto a pezas de artistas como Velázquez, Goya, Picasso e Dalí.