O Pantín Classic volverá impulsar o produto local cun espazo para artesáns e produtores de Valdoviño
O Concello de Valdoviño volverá aproveitar o escaparate internacional do Abanca Pantín Classic Galicia Pro para promocionar o talento e os produtos locais. Por segundo ano consecutivo, a administración municipal habilitará un espazo expositivo e de venda destinado aos artesáns e produtores do municipio, que poderán dar a coñecer o seu traballo durante a celebración do campionato.
A Concellería de Cultura e Turismo abriu este venres o prazo de inscrición para todas aquelas persoas interesadas en participar na iniciativa. Para formalizar a solicitude, será suficiente con enviar unha mensaxe de WhatsApp ao número 609 669 801.
O espazo estará operativo entre o 22 e o 30 de agosto no 'village' do Pantín Classic, a zona comercial e de lecer do evento. Os participantes compartirán o expositor e organizarán entre eles as quendas e os días de presenza, adaptando o calendario ás súas necesidades.
A iniciativa xa se puxo en marcha con éxito o pasado ano e tamén estivo presente na última edición do Campionato de España de Surfing, permitindo aos produtores e artesáns achegar os seus artigos a milleiros de visitantes.
Un evento de referencia internacional
O Abanca Pantín Classic Galicia Pro celebrará este ano a súa 39ª edición e faino dando un importante salto de categoría. A competición pasa a formar parte dos WSL Special Event / QS 6000 Internacional, unha nova categoría creada pola World Surf League para un reducido número de probas estratéxicas a nivel mundial.
O campionato reunirá na praia de Pantín a destacados surfistas internacionais e volverá converter Valdoviño nun dos grandes escaparates do surf europeo. Máis aló da competición deportiva, o evento ofrece unha intensa programación paralela con concertos, actividades ambientais, propostas gastronómicas, iniciativas culturais e espazos comerciais, consolidándose como unha cita de referencia para toda a familia.
Cada edición congrega preto de 100.000 visitantes, unha cifra que converte o Pantín Classic nun importante motor económico e turístico para Valdoviño e para toda a comarca. Neste contexto, o Concello considera que a presenza dos artesáns e produtores locais representa unha oportunidade para dar visibilidade ao tecido económico do municipio e favorecer a comercialización dos seus produtos diante dun público nacional e internacional.