O XXXIII Certame de Bandas 'Vila de Cedeira' reunirá tres formacións galegas nunha nova edición
Cedeira volverá converterse esta fin de semana nun punto de encontro para a música de banda coa celebración da XXXIII edición do Certame de Bandas 'Vila de Cedeira', unha cita xa consolidada no calendario cultural galego que reunirá tres formacións musicais de distintos puntos da comunidade.
O encontro terá lugar o sábado 8 de agosto no Parque do Floreal. A programación arrancará ás 18.30 horas coa tradicional saída das bandas polas rúas da vila, mentres que o concerto conxunto dará comezo ás 19.00 horas. En caso de choiva, a organización trasladará a actuación ao Auditorio Municipal.
Nesta edición participarán a Banda de Música Vila de Cedeira, anfitrioa do certame, xunto coa Banda de Música de Noia e a Banda de Música de Meira, que ofrecerán ao público un repertorio variado nunha tarde dedicada á música de banda.
O Certame 'Vila de Cedeira' alcanza xa a súa trixésimo terceira edición consolidado como un dos encontros musicais máis veteranos de Galicia. Ao longo da súa traxectoria reuniu a numerosas formacións galegas, converténdose nun espazo de intercambio musical e nun escaparate para o traballo desenvolvido polas bandas de música.
A iniciativa conta coa colaboración do Concello de Cedeira, da Deputación da Coruña e do Xeoparque Cabo Ortegal.