Ortigueira e Vilalba reciben os Premios Bibliotecas que Inspiran polos seus proxectos de memoria e literatura
Dous proxectos de bibliotecas municipais de Ortigueira e Vilalba foron distinguidos este martes cos Premios Bibliotecas que Inspiran 2026, que concede a Xunta de Galicia para recoñecer iniciativas que melloran os servizos bibliotecarios e fomentan a lectura. Os galardóns recoñecen, respectivamente, o traballo de recuperación e difusión do patrimonio documental de Ortigueira e unha proposta de promoción do legado literario de Xabier P. Docampo en Vilalba.
O conselleiro de Cultura, Lingua e Xuventude, José López Campos, entregou os premios durante a segunda Xornada Internacional de Bibliotecas Públicas Galicia-Norte de Portugal, celebrada na Cidade da Cultura, en Santiago de Compostela, baixo o lema 'Ciencia para pensar o mundo'.
Na categoría destinada a entidades locais de ata 10.000 habitantes, o recoñecemento recaeu no proxecto 'Obxectivo: memoria local', da Biblioteca Pública Municipal Juan Fernández Latorre de Ortigueira. A iniciativa céntrase en preservar e dar a coñecer os fondos documentais do municipio, considerados unha parte fundamental da súa memoria e identidade colectiva.
Pola súa banda, a Biblioteca Municipal de Vilalba obtivo o premio na modalidade de entidades locais de máis de 10.000 habitantes por 'Legado compartido'. O proxecto propón desenvolver unha iniciativa continuada de promoción da lectura arredor da figura e da obra do escritor Xabier P. Docampo, ademais de difundir o seu legado literario e a súa vinculación coa Terra Chá.
Durante a entrega, López Campos destacou a contribución de ambas as propostas á preservación da memoria local e á participación interxeracional. Tamén puxo en valor o papel das bibliotecas públicas como espazos de dinamización cultural e promoción da lectura en galego, especialmente nos municipios de menor poboación.
A xornada serviu así mesmo para abordar as medidas de apoio ás bibliotecas incluídas nos orzamentos autonómicos de 2027. Segundo avanzou a Xunta, destínanse 2,5 millóns de euros á mellora das coleccións e das actividades e á posta en marcha do terceiro Mapa de Bibliotecas Públicas de Galicia. Ademais, contémplanse 14,5 millóns para desenvolver medidas do Plan de dinamización da lectura de Galicia, entre elas o impulso aos clubs de lectura en galego.