Ortigueira organiza un obradoiro para descubrir como se vivía na Prehistoria a través da arqueoloxía experimental

O Concello de Ortigueira programa para o vindeiro luns 7 de decembro un obradoiro de modos de vida na Prehistoria, unha proposta divulgativa que busca achegar á veciñanza á vida cotiá das comunidades que habitaron Galicia durante a Prehistoria e a Protohistoria. A actividade desenvolverase no Centro Social de Ortigueira, entre as 11.00 e as 13.00 horas.
A iniciativa estará centrada na arqueoloxía experimental, unha disciplina que permite estudar o pasado reproducindo técnicas e procesos de elaboración de obxectos a partir dos coñecementos arqueolóxicos. Deste xeito, as persoas participantes poderán coñecer como se fabricaban diferentes utensilios e materiais empregados na vida diaria, cunha atención especial á cerámica de cociña.
Este tipo de experiencias permite comprender mellor os coñecementos técnicos e os recursos que tiñan ao seu alcance as comunidades antigas, así como os procedementos que utilizaban para elaborar os obxectos que precisaban. A manipulación de materiais e a reprodución de técnicas tradicionais axudan a complementar a información que achegan os restos arqueolóxicos.
O obradoiro está organizado polo Concello de Ortigueira, a través da área de Turismo e Patrimonio, en colaboración con CADO Arqueoloxía e o Xeoparque Cabo Ortegal. As persoas interesadas en participar poden solicitar información e formalizar a inscrición nos teléfonos 690 118 742 e 981 422 089.
A proposta súmase ás actividades de divulgación do patrimonio histórico e arqueolóxico da comarca, que permiten achegar o coñecemento científico á cidadanía e descubrir como evolucionaron os modos de vida ao longo do tempo.