Peter Punk levará o seu humor irreverente ás Somozas co espectáculo "Peor Imposible"
O humor irreverente e as habilidades circenses de Peter Punk chegarán ás Somozas o venres 16 de outubro coa representación de "Peor Imposible", o cuarto espectáculo deste recoñecido pallaso galego. A función comezará ás 20.00 horas no Centro Cívico Sociocultural das Somozas e estará dirixida a públicos de todas as idades.
Nesta nova proposta individual, Peter Punk conserva o estilo que marcou a súa traxectoria, cun humor transgresor ao que suma a experiencia acumulada ao longo de máis dunha década de carreira profesional. Nesta ocasión, o protagonista terá que enfrontarse ao fracaso e a unha sucesión de contratempos que parecen demostrar que todo pode ir aínda peor. A súa determinación, con todo, será facer rir ao público a calquera prezo.
O espectáculo combina situacións absurdas, destreza física e números circenses. Entre as escenas previstas figuran unha estrutura de nove paraugas en equilibrio, o salto ao baleiro dun voluntario cos ollos vendados e o chamado "Circuito da Morte". A función rematará cunha escena evocadora que pretende sorprender os máis pequenos e convidar á reflexión ao público adulto.
O pallaso presentará un personaxe optimista, equilibrado e olímpico, que buscará a complicidade dos asistentes para superar os obstáculos de cada número. As dificultades que afronta durante a actuación funcionan tamén como unha metáfora dos tempos actuais.
A actividade forma parte da programación da Rede Cultural da Deputación da Coruña.