San Mateo prepara unha tarde de sustos coa Casa do Terror e o seu paseo de luces polo Samaín
San Mateo de Trasancos volverá celebrar o Samaín cunha programación que combinará actividades participativas, ambientación de medo e propostas gastronómicas. A cita será o sábado 31 de outubro no Centro Cívico Social da parroquia naronesa e nos seus arredores, con actividades desde as 18.00 horas e propostas ata as 23.00 horas.
Un dos principais atractivos será a Casa do Terror, que abrirá ao público ás 18.45 horas e permanecerá en funcionamento durante algo máis de catro horas. A programación completarase coa Comitiva das Luces e Tebras, un paseo con fachos previsto para as 19.00 horas que percorrerá a contorna do centro cívico.
A tarde comezará ás 18.00 horas con varias actividades vinculadas a esta celebración: unha exposición de cabazas, un obradoiro dedicado a estas cabazas tradicionais e xogos temáticos do Samaín. As propostas están abertas a todas as persoas interesadas en participar.
A música tamén acompañará a xornada coa actuación de A Banda do Verán, programada para as 19.30 horas. Máis tarde, ás 20.15 horas, a Agrupación Veciñal San Mateo de Trasancos organizará unha degustación de caldo e liscos, con racións a un prezo de 2,50 euros.
A música continuará ata as 23.00 horas, cando está previsto o remate das actividades. A organización corre a cargo da Agrupación Veciñal San Mateo de Trasancos e do Concello de Narón, coa colaboración da Deputación da Coruña.