Tres días de festa, orquestras e 30 anos de San Pipote: Bardaos xa está preparada para celebrar Santa María
Bardaos xa ten todo preparado para vivir tres días de celebracións na honra de Santa María. A parroquia de San Sadurniño dará comezo este xoves a un programa festivo que combinará música, actividades populares e tradición, cun protagonista especial: o San Pipote, que este ano cumpre 30 anos.
As festas arrancarán esta noite no local social da Bañoca. A partir das 23.00 horas, o grupo De Lorean será o encargado de poñer música á primeira velada cunha actuación baseada en versións acústicas de cancións coñecidas de diferentes épocas.
A xornada do venres será o primeiro día grande das festas. O programa comezará ás 13.30 horas coa misa solemne, á que seguirá a sesión vermú coa orquestra Escaparate, prevista para arredor das 14.30 horas. A formación volverá ao escenario pola noite, a partir das 23.30 horas, xunto coa Fania Blanco Show.
Entre unha actuación e outra haberá tempo para unha das citas máis esperadas da programación: as Olimpíadas Parroquiais. Este ano a actividade adiántase ao venres e comezará ás 18.00 horas no grande campo situado xunto á área recreativa, que quedará libre de gando para a ocasión.
As probas volverán poñer á proba o equilibrio, a forza e a habilidade dos participantes a través de diferentes disciplinas tan divertidas como disparatadas, nunha das propostas máis singulares das festas de Bardaos.
O sábado chegará a terceira e última xornada das celebracións principais. A mañá comezará coas alboradas dun grupo de gaitas e percusión, que percorrerá durante o día os diferentes lugares da parroquia para levar a música festiva a todos os recunchos de Bardaos.
A misa volverá celebrarse ás 13.30 horas e estará seguida dunha traca de fogos e da sesión vermú, esta vez a cargo de Elebe 2.0. Despois dun descanso durante a tarde, a festa regresará pola noite coa actuación de Elebe 2.0 e Origen.
A madrugada terá como un dos seus momentos máis destacados a tradicional procesión do San Pipote, prevista para as 1.30 horas. Os bocois cheos de calimotxo volverán percorrer a festa e Carlos Cobelo será novamente o encargado de animar o público desde o escenario co seu particular discurso.
A festa continuará en outubro
A programación festiva de Bardaos terá aínda unha última cita o venres 16 de outubro. Ese día a Orquestra Cinema actuará na parroquia despois de que a comisión de festas resultase gañadora, por votación popular, da segunda edición do Xanela Fest.
O premio do concurso é precisamente unha actuación gratuíta da Cinema, unha formación que se atopa entre as orquestras máis destacadas do panorama galego.
Deste xeito, Bardaos prolongará a celebración máis alá da fin de semana de Santa María cunha noite de música que servirá para poñer o broche definitivo a un calendario festivo marcado polo 30 aniversario do San Pipote.