Un curso de defensa persoal para mulleres combinará autoprotección e xestión do medo en Narón
O Concello de Narón organizará os días 20 e 21 de novembro unha nova edición do obradoiro de defensa persoal para mulleres, unha iniciativa incluída no III Plan de Igualdade municipal que combinará técnicas físicas de autoprotección con pautas para previr e afrontar situacións de violencia. A actividade contará con seis horas presenciais repartidas entre o Centro Cívico Social do Alto e o Pavillón da Casa da Mocidade.
A edil de Igualdade, María Lorenzo, presentou este xoves a proposta, dirixida a mulleres e nenas a partir de 12 anos empadroadas no municipio. As menores de idade deberán acudir acompañadas dunha muller adulta.
A primeira sesión desenvolverase o venres 20 de novembro, de 16:00 a 19:00 horas, no Centro Cívico Social do Alto. A segunda terá lugar o sábado 21, de 10:00 a 13:00 horas, no Pavillón da Casa da Mocidade.
A formación será impartida por Jose Rodríguez, instrutor policial e experto en defensa persoal feminina, e por Yésica Bouza, doutora en Psicoloxía. Ademais de ensinar técnicas para liberarse dun agarre, protexerse ou manter a distancia ante unha posible agresión, o obradoiro abordará como actuar antes, durante e despois destas situacións, así como a xestión do medo.
O programa estrutúrase en tres bloques: prevención, actuación e resolución. O primeiro céntrase na identificación e evitación de situacións de risco; o segundo, nas respostas que se poden adoptar cando o conflito xa se produciu; e o terceiro, nas consecuencias posteriores, incluídas as legais, e na importancia de comunicar os feitos e denuncialos.
'Este obradoiro dálles ás mulleres e ás nenas de Narón ferramentas prácticas para sentirse máis seguras, pero tamén con máis confianza nunha mesma', sinalou Lorenzo, que animou as interesadas a inscribirse canto antes, xa que as prazas son limitadas.
Inscrición ata o 17 de novembro
As persoas interesadas poderán anotarse ata o martes 17 de novembro, en horario de 8:00 a 14:00 horas, chamando ao teléfono 633 497 990.
O Concello lembra tamén que o Servizo Sociocomunitario municipal ofrece información e asesoramento xurídico e social gratuíto e confidencial en materia de violencia de xénero, con carácter xeral mediante cita previa. Ademais, o teléfono 016 atende as vítimas de violencia de xénero as 24 horas do día.