Unha tarde de historias e música tradicional chega este sábado a Régoa con María de Pontragha
O local veciñal de Régoa acollerá este sábado, 12 de setembro, unha nova sesión de 'Cantos e Contos ao Solpor', o ciclo cultural que cada ano acompaña en Cedeira a transición do verán ao outono.
A protagonista desta nova cita será María de Pontragha, nome artístico de María Iglesias, que presentará o espectáculo 'Coa palabra na boca' a partir das 20.00 horas.
A proposta combina narración oral e música tradicional para recuperar historias relacionadas coa vida cotiá, o amor, a liberdade e a desobediencia. A artista, educadora e antropóloga leva anos dedicada á recuperación e actualización de relatos da tradición oral, con especial atención ás historias protagonizadas por mulleres galegas.
A sesión permitirá así achegar ao público unha proposta na que a palabra e a música se combinan para reivindicar a memoria e as historias transmitidas ao longo das xeracións.
Outras propostas culturais para setembro
'Cantos e Contos ao Solpor' non será a única actividade prevista en Cedeira durante este mes. O programa de paseos culturais pola vila, desenvolvido polo guía Sergio Muiño e impulsado polo Concello, continuará o próximo 24 de setembro coa visita 'Cedeira Mariñeira', que dará comezo ás 18.00 horas.
As persoas interesadas en participar neste percorrido deberán reservar previamente a súa praza a través da web de Eu Funde Vivo.
Por outra banda, tamén continúa durante setembro e outubro o programa 'Roteiros', que ofrece rutas de sendeirismo guiadas e gratuítas polo contorno de Cedeira.
A próxima saída será a ruta da Pena Bailadora, prevista para este sábado, cunha duración aproximada de catro horas. A proposta súmase á programación de actividades ao aire libre que busca dar a coñecer o patrimonio natural e paisaxístico do municipio.
As persoas interesadas en obter máis información sobre os roteiros poden dirixirse á Oficina de Turismo de Cedeira.