Unha xornada en Ortigueira analizará as oportunidades da repotenciación eólica para as comunidades de montes
Ortigueira acollerá o vindeiro sábado 21 de novembro a xornada 'Máis alá dos parques eólicos: comunidade e territorio', un foro centrado nas oportunidades que ofrece a repotenciación eólica e no papel que poden desempeñar as comunidades de montes na produción da súa propia enerxía.
A actividade desenvolverase entre as 10.30 e as 13.15 horas e está organizada pola Asociación GDR Seitura22 no marco do proxecto de cooperación Leader Redenerxía. A iniciativa conta coa colaboración do Observatorio Eólico de Galicia e do Concello de Ortigueira.
A xornada pretende abrir un espazo de debate sobre as posibilidades que teñen as comunidades de montes para participar na transición enerxética e aproveitar as oportunidades vinculadas á repotenciación dos parques eólicos. As inscricións xa están abertas a través da organización.