Eventos

A iniciativa 'Prato de Mercado' levou á Magdalena profesionais da restauración e do comercio nunha xornada con degustacións e cociña en directo

A nave da Peixería do Mercado da Magdalena converteuse este martes nun escaparate do produto de proximidade e da gastronomía local coa celebración da xornada 'Prato de Mercado', unha iniciativa da Xunta que busca reforzar a conexión entre as prazas de abastos, a hostalaría e o comercio.

O encontro contou coa participación do conselleiro de Emprego, Comercio e Emigración, José González, acompañado polo director xeral de Comercio e Consumo, Gabriel Alén, e pola delegada territorial da Xunta en Ferrol, Martina Aneiros. Na actividade participaron tamén profesionais da restauración, da hostalaría e comerciantes do mercado.

Un dos principais atractivos da xornada foi o showcooking 'Diálogos de cociña e mercado', protagonizado polo chef ferrolán Adrián Pérez, do restaurante Sinxelo. Durante a demostración, o cociñeiro preparou catro elaboracións empregando produtos frescos adquiridos no propio mercado, mostrando as posibilidades que ofrecen os alimentos de proximidade cando pasan directamente da praza á cociña.

A iniciativa pretende precisamente poñer o foco nesa relación entre os comerciantes e os profesionais da restauración. Os mercados municipais son unha fonte habitual de produtos frescos e de calidade para cociñeiros e hostaleiros, ao tempo que a gastronomía pode servir como vía para dar maior visibilidade aos propios postos e atraer novos públicos.

Durante a súa intervención, José González destacou o papel das prazas de abastos como espazos que van máis aló da actividade comercial. Segundo trasladou, estes enclaves poden funcionar tamén como lugares de encontro, dinamización e actividade gastronómica, xerando novas relacións entre o comercio, a hostalaría e o sector da restauración.

A Xunta tamén puxo en valor a capacidade dos mercados para contribuír á revitalización das contornas urbanas. A aposta pasa por combinar o carácter tradicional destes espazos coa innovación e coa adaptación aos novos hábitos de consumo, buscando que continúen sendo referentes para a compra de produtos frescos e, ao mesmo tempo, puntos de interese para veciñanza e visitantes.

A celebración en Ferrol tivo como escenario unha nave da Peixería recentemente rehabilitada, que acolleu unha actividade destinada tanto aos profesionais do sector como a poñer en valor ante a cidadanía a variedade e calidade dos produtos que se poden atopar nas prazas de abastos.

'Prato de Mercado' forma parte das actuacións previstas no Plan Estratéxico do Comercio de Galicia 2025-2030, que inclúe entre as súas liñas de traballo a promoción e modernización dos mercados e a creación da Rede de Mercados Excelentes de Galicia.

O obxectivo é avanzar cara a uns mercados máis competitivos e atractivos, capaces de manter a súa función tradicional de abastecemento pero tamén de incorporar novas actividades e experiencias arredor da alimentación, a gastronomía e o comercio local.