O mel galego máis premiado reunirá en Narón a apicultores, gastronomía e tradición
Narón celebrará o domingo 18 de outubro a XXV Feira do Mel e da Produción Primaria, unha cita que alcanza o seu 25 aniversario cunha programación centrada no produto de proximidade, a apicultura e a gastronomía. O Recinto Feiral do Trece, en Sedes, acollerá durante toda a xornada ata nove postos de apicultores recoñecidos no certame galego 'Mel Cinco Estrelas'.
A concelleira de Festas, Mar Gómez, presentou a programación xunto ao responsable comarcal da Asociación Galega de Apicultura (AGA-Daga Ferrolterra), Rafael Díaz. A feira permitirá coñecer de preto os produtos elaborados por apicultores galegos e degustar algunhas das variedades de mel máis destacadas do certame.
Segundo explicou Díaz, os produtores presentes na feira obtiveron o recoñecemento no concurso 'Mel Cinco Estrelas', no que participan centos de apicultores de Galicia. Entre os premiados da pasada edición figuran dous veciños de Narón, que conseguiron os galardóns ao mellor mel monofloral de érica e ao mellor mel monofloral de eucalipto.
Os meles premiados volverán estar presentes na feira, polo que as persoas asistentes poderán probar unha selección de produtos recoñecidos no certame e coñecer de primeira man o traballo dos seus produtores.
Unha xornada con gastronomía, divulgación e actividades familiares
A feira abrirá ás 11.00 horas. Media hora despois, o percebeiro Xesús Outes Dasilva, da Confraría de Pescadores de Ferrol, ofrecerá o relatorio 'Vivencias dun percebeiro'. Ás 12.00 horas terá lugar a demostración culinaria 'Cociñando con mel' e, ás 13.00 horas, a Confraría realizará unha segunda demostración acompañada dunha degustación de produtos do mar.
Entre as 13.00 e as 14.00 horas haberá sesión vermú e, posteriormente, o recinto permanecerá pechado para o xantar ata as 16.00 horas.
As actividades da tarde comezarán ás 17.00 horas co relatorio 'Polinización e biodiversidade, a importancia das abellas', impartido polo técnico apícola Rafael Díaz. Ás 17.30 horas celebrarase o tradicional magosto e ás 18.00 horas terá lugar a presentación e degustación dos meles gañadores do concurso 'Mel Cinco Estrelas'.
Durante toda a xornada tamén haberá obradoiros infantís, actividades divulgativas no posto da AGA e exposicións de láminas didácticas monitorizadas. Ademais, as persoas asistentes poderán participar no sorteo de cestos con produtos da feira.
A programación inclúe tamén degustacións gratuítas de pan e queixo do país acompañados de 'Mel Cinco Estrelas', que se ofrecerán de 12.00 a 13.30 horas e de 17.00 a 19.00 horas.
A XXV Feira do Mel e da Produción Primaria está organizada polo Concello de Narón coa colaboración de AGA-Daga Ferrolterra. A organización anima á veciñanza e ás persoas interesadas na apicultura e nos produtos de proximidade a achegarse o domingo ao Recinto Feiral do Trece.