O Porco do Ortegal volve ser protagonista en Cedeira cunha fin de semana dedicada á gastronomía
A gastronomía volverá ocupar un lugar destacado este fin de semana en Cedeira coa celebración da terceira Festa do Porco do Ortegal, unha cita que terá como escenario a praza do Floreal durante o sábado 22 e o domingo 23 de agosto.
A proposta nace arredor dun produto que nos últimos anos gañou protagonismo na comarca e que ten na carne de porco o seu principal atractivo. Ao longo das dúas xornadas, o público poderá achegarse para probar diferentes elaboracións e coñecer de preto o traballo que hai detrás da preparación das pezas.
A organización, encabezada por Christian García, de Cárnicas Vilarelle, manterá durante a celebración unha oferta gastronómica con diferentes alternativas, tanto para consumir no propio recinto como para levar.
Entre as opcións previstas atópase o variado, cun prezo de 25 euros, o pastelón, por 15 euros, e os bocadillos de lacón e longaniza, que terán un custo de 10 euros. Tamén se ofrecerá café de pota por un euro.
Un dos atractivos da festa estará precisamente en poder comprobar como se prepara a carne. O público poderá ver parte do traballo de cociña e da elaboración das distintas pezas, nunha celebración que pretende poñer en valor tanto o produto como a tradición gastronómica ligada ao territorio.
Dúas xornadas con ambiente festivo
A programación non se limitará á parte culinaria. Tanto o sábado como o domingo haberá sesión vermú, contribuíndo a crear un ambiente festivo arredor da praza do Floreal.
A cita pretende así atraer tanto ás persoas interesadas especificamente na gastronomía como a familias e visitantes que busquen unha actividade para pasar parte da fin de semana en Cedeira.
A festa chega ademais despois da boa resposta obtida nas dúas primeiras edicións, que permitiron consolidar progresivamente a convocatoria no calendario estival da comarca.
O encontro tamén serve para reivindicar o valor dos produtos vinculados ao Ortegal e para dar visibilidade a unha actividade gastronómica que busca diferenciarse a través da calidade da materia prima e das elaboracións tradicionais.
Durante sábado e domingo, a praza do Floreal converterase así nun espazo de encontro arredor da gastronomía, cunha proposta na que o porco será o protagonista e na que non faltarán música e ambiente festivo.