Pepe Coira leva a San Sadurniño os segredos de 'Hierro' e 'Rapa' nun obradoiro de guión
Como se constrúe unha historia para o cine ou a televisión? Que hai detrás dun bo guión e como se transforma unha idea nunha narración audiovisual? As persoas interesadas en descubrir as claves deste proceso terán a oportunidade de facelo da man dun dos guionistas galegos con maior traxectoria.
Pepe Coira impartirá o próximo xoves 27 de agosto en San Sadurniño o obradoiro 'Contar co cine. Unha introdución ao guión'. A actividade desenvolverase na Casa da Xuventude entre as 16.30 e as 21.00 horas e terá carácter gratuíto, aínda que as prazas están limitadas a un máximo de 15 participantes.
O seu nome está detrás de títulos como 'Hierro' e 'Rapa'. A primeira, creada xunto ao seu irmán, o director Jorge Coira, converteuse nun dos grandes éxitos recentes da ficción televisiva española. 'Rapa', creada xunto con Fran Araújo, levou o thriller á Galicia contemporánea e contou con tres tempadas protagonizadas por Javier Cámara e Mónica López.
A traxectoria de Pepe Coira vai, con todo, moito máis alá destas dúas series. Entre os seus traballos máis recentes figura 'La canción', centrada na participación española no Festival de Eurovisión de 1968, e 'Antes de nós', película dirixida por Ángeles Huerta arredor da figura de Castelao e da súa relación con Virxinia Pereira.
O guionista e produtor participou tamén en numerosos proxectos de ficción e non ficción e está vinculado a títulos como 'Mareas vivas', 'As leis de Celavella', 'Gran Nord', 'Terra de Miranda', 'Eroski-Paraíso' ou 'O corpo aberto'. Ao longo da súa carreira recibiu, entre outros recoñecementos, premios Ondas, Feroz, Iris e Mestre Mateo.
Unha clase maxistral antes do XI Chanfaina Lab
O obradoiro de Coira forma parte da programación complementaria do Chanfaina Lab, o encontro audiovisual que regresará a San Sadurniño entre os días 4 e 6 de setembro para celebrar a súa undécima edición.
Nesta ocasión participarán 26 cineastas e colectivos, que volverán percorrer as sete parroquias do municipio para crear pezas audiovisuais de entre tres e cinco minutos. Cada participante terá liberdade para decidir tanto a historia como a forma de contala.
O fío visual desta edición estará relacionado coas Escolas da Emigración de Ferreira, dous edificios construídos a comezos do século XX grazas ás achegas das comunidades emigradas en Bos Aires e Montevideo. A temática, con todo, non limitará as propostas creativas dos participantes.
Outro obradoiro sobre montaxe no outono
A programación formativa terá continuidade o 30 de outubro cun segundo obradoiro, neste caso centrado na montaxe audiovisual. Baixo o título 'Hoxe móntase! Contando historias plano a plano', a sesión estará impartida por Lucía Iglesias Fuentes, montadora da produtora Portocabo e gañadora dun Mestre Mateo polo seu traballo en 'Antes de nós'.
Iglesias Fuentes participou tamén na montaxe de 'Hierro' e 'Rapa', polo que os dous obradoiros permitirán abordar dúas fases fundamentais da creación audiovisual da man de profesionais vinculados a producións de referencia.