San Sadurniño celebrará as súas segundas xornadas micolóxicas os días 27 e 28 de novembro
O Concello de San Sadurniño volverá achegar a veciñanza ao mundo dos fungos coa segunda edición das xornadas micolóxicas, que se celebrarán o venres 27 e o sábado 28 de novembro. A proposta combinará formación teórica e práctica para aprender a recoñecer as distintas especies que medran nos montes da comarca, da man do especialista José Luis Cuba.
A programación arrancará o venres 27 cunha charla introdutoria na Casa da Xuventude, de 20:00 a 21:30 horas. Durante a sesión, as persoas asistentes poderán coñecer algunhas das principais especies presentes na zona, as súas características e outras cuestións que se abordarán posteriormente durante a saída ao monte.
A parte práctica terá lugar o sábado 28, entre as 8:30 e as 14:30 horas. As persoas participantes sairán desde a Casa da Xuventude cara aos montes da contorna, posiblemente ao Forgoselo, para identificar e recoller cogomelos sobre o terreo. Tanto a charla como o percorrido estarán guiados por José Luis Cuba, un dos referentes da divulgación micolóxica en Ferrolterra e Ortegal.
Cuba compaxina a súa actividade profesional como músico coa formación e divulgación sobre fungos e cogomelos. Ademais das saídas de campo que dirixe, comparte os seus coñecementos na canle de YouTube 'Luis Cuba y la Micología', que conta con preto de 24.000 persoas subscritas. Tamén é autor da guía 'Cogomelos da terra de Ortegal', na que reúne información sobre máis dun cento de especies, os seus hábitats e as súas características.
Inscrición aberta ata o 24 de novembro
As xornadas teñen un prezo de 10 euros e ofrecen un máximo de 25 prazas. As persoas interesadas en participar deberán reservar a súa antes do martes 24 de novembro, mediante un correo electrónico ao enderezo agustin.perez@sansadurnino.gal.
Unha recollida responsable e segura
A actividade tamén permitirá lembrar a importancia de recoñecer correctamente as especies antes de recollelas. Non existen regras sinxelas baseadas na cor ou na forma que permitan distinguir con seguridade os cogomelos comestibles dos tóxicos, polo que só se deben apañar exemplares perfectamente identificados.
A normativa galega establece, con carácter xeral, un límite de dous quilos por persoa e día para a recollida destinada ao consumo propio, sempre que non haxa restricións específicas na zona. Tamén recomenda extraer os cogomelos sen danar o chan e transportalos en cestos que faciliten a dispersión das esporas.
Cómpre respectar igualmente a propiedade privada e comprobar se existen limitacións ao aproveitamento micolóxico. As persoas propietarias de montes que queiran prohibir a recollida por parte de terceiros deben comunicar á Xunta o acoutamento da parcela e sinalizalo claramente no seu perímetro.
No caso do monte Forgoselo, existe un couto micolóxico impulsado pola Asociación de Veciños Monte Forgoselo, que conta cun sistema propio de regulación. As persoas socias poden recoller cogomelos de balde para consumo propio, mentres que o resto deberán obter o permiso correspondente.
Esta tempada, os permisos non se venderán por internet. Poderán adquirirse no bar 3×4, en As Neves, e na tenda da Cooperativa Campo Capela, en Os Calzados. Para obter máis información, tamén se pode contactar coa asociación a través do correo electrónico avforgoselo@gmail.com.